阿嫲被姦殺後（上）
71歲嘅阿嫲被姦殺，屍體被發現時，手腳被綁，下半身赤裸。
嗰年我十歲，唔係好理解咩叫姦殺，我只知道，阿嫲遇到壞人，俾壞人殺咗。
我同細佬一路喊，一路叫囂住要懲罰個壞人。
八歲嘅細佬仲著埋佢件超人衫，想衝出門口，打扁個壞人。
父母努力提供線索，回憶阿嫲呢排嘅行蹤，希望可以搵到凶手。
但呢種眾志成城，慢慢發生咗一種奇異嘅改變。
警方未搵到凶手，之後嗰幾個月，發生咗四宗類似嘅姦殺案，受害人由18歲至25歲不等。
根據犯案嘅模式同線索，警方認為，應該係同一個凶手所為，係連環殺人案。
一時之間，呢單案成為成個城市嘅焦點，女士人人自危，唔敢單獨出門口。
而我哋屋企亦受到奇怪嘅關注，總有幾個八婆假惺惺地安慰幾句，然後講一啲奇怪嘅說話。
「其他受害者都係後生女，得你阿嫲係阿婆，你阿嫲一定好靚啦。」
「你阿嫲係咪好鍾意著到花花綠綠㗎？唉，其實幾十歲人，都係唔好咁花枝招展。」
「你阿爺死咗咁多年，阿嫲係咪好寂寞？不過冇咗條命仔就唔抵啦。」
同學都對我投以好奇嘅目光，或者佢哋仲未理解咩叫姦殺，但佢哋知道，我阿嫲經歷咗一件好奇異嘅事，一般人一生都唔會遇上嘅事。
因為奇異，所以歧視。
父母開始沉默，唔再咁熱衷於搵線索，甚至默默地搬咗家，我都冇出聲。
只有細佬，一如既往地成日著住件超人衫，叫囂住要懲罰壞人，然後被父母拖番屋企。
我同細佬慢慢長大，凶案斷斷續續咁發生咗五年，超過十個女人遇害，包括另一個老婆婆。
不過，呢啲嘢已經唔再重要，時間可以撫平一切，包括傷痛同流言蜚語。
直到細佬成年後，有一日，佢好開心咁同我講，佢終於成立咗「受害者聯盟」，問我加唔加入。
「乜嘢聯盟？」我幾乎懷疑自己聽錯。
細佬答：「我聯絡咗另外九個受害者嘅家屬，有七家人都同意加入聯盟，一齊搵到凶手，將佢繩之於法。」
我忍唔住講：「阿嫲單案已經過去咗十年，當年查咗兩萬個疑犯都搵唔到凶手。」
細佬充滿信心：「天網恢恢，疏而不漏。」
「最近五年，都冇類似嘅案件，可能凶手已經死咗。」我又講。
細佬咬牙切齒：「或者佢結婚生仔，修心養性，幸福美滿。佢嘅罪惡冇人知道，人人都以為佢係一個好男人，咁樣公平咩？」
我當然無法勸服細佬，所以，我哋各有各嘅生活。
我繼續正常地生活，冇再提起阿嫲。
細佬就一心搵凶手，每逢科學界有咩新嘅鑑證技術，細佬都會留意，睇吓同阿嫲單案有冇關係，但一直都冇進展。
距離阿嫲嘅死，已經過去咗十年、二十年、三十年。
下集：https://bit.ly/33rn0Ao
我嘅職業係：冒牌喪屍：https://goo.gl/7E71nW
霸道總裁愛上你：http://bit.do/e4FWX
#短故 #短篇 #小說 #陳美濤 #廣東話 #粵語 #tomatochan #阿嫲被姦殺後
Search